Um Náttúruhlaup
Hlaup í náttúru Íslands verða sífellt vinsælli og hafa utanvegahlaup aldrei verið vinsælli. Íslendingar hafa fyrir löngu uppgötvað frelsið og fegurðina sem felst í fjallgöngum, en síðustu 15 ár hafa utanvegahlaup rutt sér til rúms á meðal almennings.
Með því að sameina hlaupin og útiveru í náttúrunni fæst það besta úr báðum heimum.
Uppgötvaðu nýjan lífsstíl og hlaup í fallegu umhverfi með okkur í Náttúruhlaupum!
Sýn Náttúruhlaupa
Tilgangurinn með Náttúruhlaupum er að stuðla að góðri heilsu og aukinni hamingju fólks með því að leiða það inn í nýjan lífsstíl og vera farvegur fyrir fólk til að stunda hlaup í náttúrunni í góðum félagsskap.
Náttúruhlaup kynna fólki fyrir þessum lífsstíl á grunnnámskeiðum Náttúruhlaupa og í Hlaupasamfélagi Náttúruhlaupa. Við bjóðum einnig upp á hlaupaferðum innanlands og erlendis ásamt fleirum námskeiðum, keppnishlaupum og hlaupaviðburðum.
Rannsóknir benda til þess að náttúran hafi jákvæð áhrif á andlegu heilsu fólks. Eins eru jákvæð áhrif hreyfingar, bæði á líkama og sál, vel þekkt. Samfélag, vinátta og að tilheyra hópi, ýtir sömuleiðis undir hamingju og jafnvægi.
Við leggjum áherslu á að fólk læri að njóta þess að hlaupa í náttúrunni. Náttúruhlaup stuðla einnig að því að fólk komist í gott form á skynsamlegan hátt undir faglegri handleiðslu. Með þessum hætti eru meiri líkur á að fólk geri hlaup í náttúrunni að lífstíl.
Gildi Náttúruhlaupa eru: Lífsgleði – Fagmennska – Umhyggja.
Náttúruhlaup hófu starfsemi 2014 með hinu sívinsæla grunnnámskeiði í Náttúruhlaupum. Fljótlega varð til Hlaupasamfélag Náttúruhlaupa þar sem fólk mætti endurtekið á námskeið og ljóst var að fólk vildi ekki bara kynningu á þessum lífsstíl, heldur ákveðinn farveg og samfélag.
Síðan þá hefur framboð stöðugt aukist með spennandi hlaupaferðum, undirbúningsnámskeiðum og keppnishaldi.
Teymi Náttúruhlaupa samanstendur af fjölbreyttum hópi fólks sem hefur það sameiginlegt að hafa mikla ástríðu fyrir hlaupum og að miðla henni áfram.
Við erum stolt af þjálfurum og leiðtogum okkar. Öll endurspegla þau gildi Náttúruhlaupa sem eru lífssgleði, fagmennska og umhyggja.
Ég hefði ekki getað trúað því að ég myndi hlakka til að vakna snemma á laugardagsmorgni til að fara út í hvaða veður sem er en það var allaf yndislegt. Gaman að vera búin að kynnast öllum þessum skemmilegu hlaupaleiðum og frábært að þurfa ekki að leita langt útfyrir borgina til að komast í snertingu við náttúruna
Námskeiðið var vel skipulagt og fræðslan og fyrirkomulag til fyrirmyndar! Það er eitthvað dásamlegt við að blanda saman að hlaup og náttúru en þó alltaf með áhersluna á að njóta og upplifa. Þakka kærlega fyrir mig, er klárlega kolfallin náttúruhlaupandi!
Ég hef aldrei verið á jafngóðu og skemmtilegu námskeiði. Utanumhald frábært og ótrúlega gagnlegt og skemmtilegt að mæta á æfingar. Varð bara að koma þessu frá mér! Takk
Ég hef verið í íþróttum frá því ég man eftir mér. Í tengslum við þær íþróttir hef ég verið látin hlaupa úti og inni. Ég hef aldrei þolað það. Kviðið fyrir því og hugsað allan tímann á meðan ég hleyp hversu léleg ég er og hversu leiðinlegt það er að hlaupa. Þegar líkamsræktarstöðvar lokuðu á meðan á Covid19 stóð sá ég tækifæri í því að njóta náttúrunnar og vonandi að læra að kunna að meta að hlaupa í leiðinni. Mér óraði ekki fyrir breytingunni á fyrst og fremst hugarfari en líka hversu vel mér gekk að hlaupa. Búin að segja upp samningnum í líkamsræktarstöðinni og hlakka mikið til náttúrunnar, útiverunnar og komandi hlaupa.
Námskeiðið var meiriháttar! Hlaupin virkilega skemmtileg og fræðslan og þá sérstaklega hvernig hugsa á um líkamann fyrir, á meðan og eftir hlaup til fyrirmyndar! Besta hreyfing og núvitund sem ég hef prófað. Ég hef klárlega fundið mitt nýja uppáhalds áhugamál.
Kostir náttúruhlaups
- Allir kostir þess að skokka og hreyfa þig
- Hreint og tært loft, enginn útblástur, ekkert svifryk
- Hægt að njóta náttúru og landslags um leið og hlaupið er
- Aukin fjölbreytni í hlaupaleiðum
- Áfangastaðirnir verða markmið í sjálfu sér, ekki bara bið eftir næsta hlaupi
- Reynir á fleiri þætti fótaburðar og úthalds
- Mýkra undirlag reynir minna á liði en hörð gata eða gangstétt
- Engir bílar, ekkert malbik, engin steypa
- Friðsæl náttúran eflir andann jafnt og líkamann
