Umhverfis fjallið hvíta með náttúruhlaupum

Náttúruhlaup bjóða loksin aftur upp á hlaupaferð umhverfis Mont Blanc í ágúst 2022!

Farin verður hin sögufræga leið Tour du Mont Blanc (TMB) sem er einnig leiðin í frægasta  utanvegahlaupi heims Ultra-Trail du Mt. Blanc (UTMB). Það kemur ekki á óvart að þeir sem hafa hlaupið á þessu magnaða alpasvæði fara aftur og aftur. Ferðin hentar öllum vönum hlaupurum hvort sem markmiðið er að njóta í botn eða nýta hana sem æfingaferð…eða bæði!

Leiðin sjálf er um 170 km og heildarhækkun um 10 þúsund metrar. Í ferðinni verður farið yfir meirihlutann af leiðinni (120km+) og verður einblínt á fallegustu hluta hennar. Leiðin byrjar í Frakklandi en liggur svo yfir til Ítalíu á annarri dagleið og Sviss á hinni fjórðu. Síðasti hlaupadagurinn er ógleymanlegur þar sem Mt. Blanc og nálægir tindar blasa við allan tímann.

  • Dagsetningar: Ágúst (4.-11.) UPPSELT. Hægt er að skrá sig á biðlista (elisabet (a) natturuhlaups.is) og verður látið vita um leið og sæti losna og/eða þegar önnur brottför verður kynnt.
  • Lengd: 8 dagar (7 nætur)
  • Hópastærð: 20
  • Verð: 249.000 kr.
  • Verð fyrir áskrifendur í Náttúruhlaupum: 239.000 kr. 
  • Skráning opnar 15. nóvember
  • Fararstjórar: Elísabet Margeirsdóttir og Halldóra Gyða Matthíasdóttir Proppé.
  • Tengiliður/nánari upplýsingar: elisabet (a) natturuhlaup.is
  • Mælt er með því að bóka ekki flug fyrr en ferðin hefur verið staðfest. 
20190813 152105

Bonatti skálinn á degi 4 í ferðinni

Hlaupaleiðin

Leiðin sjálf er um 170 km og heildarhækkun um 10 þúsund metrar. Í ferðinni verður farið yfir meirihlutann af leiðinni (120km+) og verður einblínt á fallegustu hluta hennar. Leiðin byrjar í Frakklandi en liggur svo yfir til Ítalíu á annarri dagleið og Sviss á hinni fjórðu. 

Hlaupið er um dali og fjallaskörð og hver dagur býður upp á nýja sýn á Mt. Blanc fjallgarðinum. Hópurinn gistir ýmist á hótelum og góðum skálum og verður farangri trússað á milli staða (fyrir utan einn dag). Það má því segja að þetta sé algjör lúxusferð í einu fallegasta landslagi í heimi þar sem við njótum stórfenglegrar náttúru á hlaupum. Fararstjórar ferðarinnar skipuleggja hvern dag þannig að allir nái að ferðast á þægilegum hraða. Suma daga getur hópnum verið skipt upp eftir því hversu hratt fólk vill fara. Miðað er við að allir klári hverja dagleið á svipuðum tíma. Það er fátt betra en að skála saman í skála eftir gott dagsverk!

Screenshot 2021 11 11 at 16.14.39
Fyrir hverja er ferðin?

Fyrir hverja er ferðin?

Ferðin hentar hlaupurum með reynslu af undirbúningi fyrir lengri hlaup eða utanvegahlaup. Allir sem hafa hlaupið með svarta og silfurgráa hópnum í Náttúruhlaupum ættu að ráða vel við ferðina og flestir í vínrauða hópnum með góðum undirbúningi. 

Hraðinn verður þægilegur og það verður tryggt að allir njóti sín. Brattar brekkur eru á leiðinni og því skiptast dagleiðir upp í hlaup og göngu með reglulegum stoppum.

Ég er að fara í UTMB (OCC, CCC, TDS, UTMB) eða annað keppnishlaup í haust. Hentar ferðin mér? Já ferðin er upplögð fyrir alla sem eru að stefna á lengri fjallahlaup. Frábært tækifæri til að þjálfa sig að fara upp og niður langar brekkur og finna hvernig það er að hreyfa sig í þynnra lofti.

Fararstjórar

Hópurinn mun njóta leiðsagnar Elísabetar Margeirsdóttur og Halldóru Gyðu Matthíasdóttir Proppé.  Báðar eru þær þaulreyndir utanvegahlauparar og þekkja svæðið og aðstæður þess mjög vel. Þær búa yfir mikilli reynslu og þekkingu á hlaupaferðum og utanvegahlaupum m.a. UTMB, Grand Raid de la Réunion og Tor des Géants. Þær hafa lengi unnið að verkefnum saman og fóru meðal annars með hóp á vegum Náttúruhlaupa hringinn í kringum Mont Blanc árið 2019. 

Þær munu tryggja að allir í ferðinni upplifi öryggi og njóti sín allan tímann. Þetta verður erfitt á köflum, en fyrst og fremst skemmtilegt!

20190813 204239 scaled
Hvað er innifalið?

Innifalið í verði: Fararstjórn, gisting í skálum (3 nætur) og á hótelum (4 nætur), 2x rútuferðir, morgunverður alla daga og 4x kvöldverðir, trúss á farangri á milli gististaða nema á degi 4.

Ekki innifalið í verði: Flug, akstur til og frá Chamonix, kvöldverður á degi 1, 3 og 7,  hádegisverðir, drykkir.

20190813 192151 1 scaled
Dagskrá ferðarinnar

Dagur 1 / Ísland – Genf – Chamonix

Ferðin hefst í fjallabænum Chamonix þar sem hópurinn gistir á hóteli fyrstu nóttina og við förum yfir dagleiðir næstu daga. Gisting á hóteli í 2ja manna herbergjum.

Dagur 2 / Les Contamines-Montjoie – Les Chapieux: 17 km og um 1200 m hækkun

Við byrjum ferðina með trompi og skellum okkur strax upp lengsta klifrið í mögnuðu umhverfi alpanna. Hlaupið hefst í Les Contamines og er hlaupið að Notre Dame kirkjunni.  Þaðan liggur leiðin yfir Bonhomme (2329m) og Croix du Bonhomme skörðin (2433m). Á leiðinni er upplagt að fá sér hádegishressingu í Bonhomme skálanum. Eftir hressingu hlaupum við niður í smáþorpið Chapieux (1549m) og gistum þar í fjallaskála. 

-Tökum lengsta klifrið á ferskum fótum og upplifum dásemdir alpanna strax á fyrsta hlaupadegi.

-Kvöldverður, morgunverður og gisting í fjallaskála. Fáum farangur okkar í skálanum og getum ferðast mjög létt.

Dagur 3 / Les Chapieux – Courmayeur (Ítalía): 27 km og um 1200 m hækkun

Dagurinn byrjar á vegi inn Jökuldalinn og sem leiðir okkur að Col de la Seigne skarðinu (2516m). Við höldum upp Seigne skarðið en það skilur að Frakkland og Ítalíu. Kunnugir tindar eins og Mont-Blanc de Courmayeur, la Noire de Peutrey, les Grandes-Jorasses virðast vera rétt innan seilingar. Við höldum svo niður í Veny dalinn og fáum okkur hressingu í Elisabetta skálanum (2195 m). Skálinn stendur undir skriðjökli og gríðarfallegum tindum sem heita Pýramídarnir. Ef aðstæður eru góðar má taka krók í kringum Pýramídana en þeim spotta var bætt við Ultra-Trail du Mont Blanc hlaupið fyrir nokkrum árum. Við hlaupum næst niður í Veny dalinn framhjá Combal vatninu áður en við höldum upp í næsta skarð. Leiðin héðan og til Courmayeur er líklega ein sú mikilfenglegasta. Fyrir ofan Courmayeur (1226) er skemmtilegur skáli, Maison Veille (1956m), þar sem gott er að fá sér létta hressingu og slaka aðeins á áður en við brunum niður langa brekku í bæinn. Eftir gott bað á hóteli í Courmayeur er upplagt að rölta í bæinn, kíkja á útivistarbúðir og fá sér gourmet ítalska máltíð. Gisting á hóteli í Courmayeur. 

-Gríðarlega flottur alpadagur á leið sem er mjög hlaupanleg. Dásamleg fjallasýn allan tímann og skemmtilegt niðurhlaup til Courmayeur. Algjör gulrót að koma inn á hótel eftir langan dag á fjöllum og upplagt að verðlauna sig með 7 rétta ítalskri máltíð (á eigin kostnað :-).

-Morgunverður og gisting á hóteli. Kvöldverður ekki innifalinn í verði.

Dagur 4 / Courmayeur – Bertone – Bonatti: 12 km og um 790 m hækkun

Þessi dagur verður styttri og léttari en við þurfum að bera með okkur örlítið aukadót fyrir tvo hlaupadaga þar sem enginn vegur liggur til skálans sem við gistum í. Við njótum fyrri hluta dagsins í Courmayeur og stefnum á að vera komin í Bonatti fjallaskálann seinni partinn. Hér gæti veðrið ráðið því hversu snemma við leggjum í hann. Hlaupið hefst úr bænum og við stefnum á Bertone skálann (1989 m) sem stendur á brekkubrúninni. Þar er hægt að fá sér hressingu áður en við skokkum eftir fjallshlíð Ferret dalsins. Við nemum staðar við Bonatti skálann (2025 m) og komum okkur fyrir. Skálinn er einn sá flottasti á TMB leiðinni með frábærri aðstöðu. Þeir sem vilja meira brölt þennan dag geta rölt/skokkað í Malatra skarðið en aðeins ef tími og veður leyfir.

-Styttri hlaupadagur þar sem verður lögð áhersla á að njóta Ítalíu og útsýnis.

-Kvöldverður, morgunverður og gisting í Bonatti skálanum.

Dagur 5 / Bonatti – Ferret skarð – La Fouly: 20 km og um 770m hækkun

Í dag liggur leiðin yfir til Sviss og við höldum áfram inn dalinn að Ferret skarðinu (2537 m). Upplagt er að horfa til baka eftir Veny dalnum og yfir að Seigne skarði áður en við höldum niður samnefndan dal Sviss megin landamæranna. Útsýnið er talsvert annað en við eigum að venjast frá göngu undanfarinna daga og ekki laust við að minni ögn á heimaslóðir. Við gerum stuttan stans við La Peule (2071 m) og getum fengið okkur hressingu þar áður en við höldum áfram til bæjarins La Fouly (1610 m). Í Fouly fáum við okkur góðan hádegismat. Hópnum verður skutlað til Champex (1466 m) þar sem við fáum farangurinn okkar og gistum í nótt. Bærinn Champex er vel í sveit settur við lítið fjallavatn og umlukinn skógi. Ótrúleg fegurð sem við fáum að upplifa þar. 

-Dásemdar dagur þar sem við klífum yfir til Sviss í stórkostlegu landslagi Veny dalsins. 

-Gisting á gistiheimili í tveggja manna herbergjum. Kvöldverður og morgunverður innifalinn.

Dagur 6 / Champex – Vallorcine: 25 km og um 1500m hækkun

Þessi dagur verður strembinn þar sem við förum yfir tvö skörð á leiðinni. Við höldum frá Champex og förum yfir les Bovines til smábæjarins Trient (1300 m). Hægt er að fá sér hressingu á leiðinni niður til Trient áður en við höldum áfram yfir næsta skarð, Col de Balme (2191m).  Við endum daginn á langri brekku niður til bæjarins Vallorcine (1260 m). Þegar komið er til Vallorcine mun hópurinn nota lestina til að koma sér á gististað. Ef það er einhver orka eftir þá má einnig hlaupa þangað. Eftir krefjandi dag borðum við góða máltíð og gistum í mögnuðum skála í dalnum. Ef veðrið er einstaklega gott þá verður hægt að fara aðra leið yfir hið mikilfenglega Fenêtre d’Arpette skarð (2665m) yfir til Vallorcine. 

-Langur dagur á flottum stígum þar sem við förum frá Sviss yfir til Frakklands á ný. 

-Kvöldverður, morgunverður og gisting á gistiheimili. Farangri skutlað frá Champex.

Dagur 7 / Col des Mottets – La Flegere – Chamonix: 14 km og um 700m hækkun

Síðasti hlaupadagurinn býður upp á stórbrotið útsýni yfir Chamonix dalinn og Mt. Blanc.  Frá skálanum liggur leiðin til Tete aux Vents (2130) og La Flegere skálans. Ef veður er gott munum við bæta við stuttum spotta að Lac Blanc sem er aðeins ofar í hlíðinni en þar er stórkostleg náttúra og útsýni. Frá Flegere liggur leiðin nánast beint niður til Chamonix um skemmtilegan skógarstíg. Við hlaupum síðasta spottan með bros á vör að kirkjutorginu þar sem við skálum eftir magnaða viku. 

-Ógleymanlegur hlaupadagur þar sem toppur Mt. Blanc og nálægir tindar blasa við allan tímann. 

-Gisting á hóteli í tveggja manna herbergjum. Kvöldverður ekki innifalinn

Dagur 8 / Chamonix – Genf – Ísland

Ferðalag heim

20190812 123031 1 scaled
20190814 081011
20190815 143544
20190812 103248
20190813 132806
20190814 165152
20190811 111247
20190814 121053
20190814 111437
20190813 204223

Náttúruveitan