Everest Maraþon 2023
Náttúruhlaupin bjóða upp á spennandi hlaupaferð til Nepals, Everest maraþonið, hæsta maraþon í heimi. Ferðin er staðfest!
Everest Maraþon með Náttúruhlaupum!
Tenzing Hillary Everest Maraþonið er alþjóðlegur íþróttaviðburður þar sem hlaupin er 42 km leið úr Grunnbúðum Everest niður í Namche Basar, höfuðstað Sherpana. Hlaupið fer fram 29. maí ár hvert en það er dagurinn sem Tenzing Norgay Sherpa og Edmund Hillary komust á topp Everest árið 1953 í fyrstu uppgöngunni á fjallið. Hlaupið verður haldið í 20. skiptið árið 2023 og koma þátttakendur alls staðar að úr heiminum.
Boðið er upp á 60 km ultra maraþon, 42 km maraþon og 21 km hálfmaraþon. Hlaupið er eftir góðum göngustígum sem liggja að mestu niður á við en það má benda á að það er erfitt að hlaupa í svona mikilli hæð. Í ferðinni er því gert ráð fyrir góðum tíma til þess að aðlagast hæðinni þegar hópurinn gengur rólega upp í Grunnbúðir Everest fyrir hlaupið.
Athugið: Allar myndir af Halldóru hlaupandi eru teknar af Ólafi Má Björnsyni, aðrar Everest myndir eru teknar af Leifi Erni Svavarssyni og Sigrúnu Hrönn Hauksdóttur.
Fyrir hverja er ferðin?
Tenzing Hillary Everest maraþonið hentar hlaupurum sem eru í góðri líkamlegri þjálfun og vanir hlaupum.
Einnig er hægt að sleppa því að taka þátt í hlaupinu sjálfu, en ganga upp í Everest base camp með hópnum og niður degi á undan til að taka á móti hlaupurunum.
Þessi ferð er fyrir alla sem vilja bæta stóru ævintýri í líf sitt og eru tilbúnin í áskorun!
Fararstjórar
Fararstjórar í ferðinni eru þau Halldóra Gyða Matthíasdóttir og Helga María Heiðarsdóttir.
Halldóraer hlaupaleiðsögumaður og hlaupari. Hún er með mikla reynslu af fjallahlaupum þar sem hún hefur hlaupið eitt 330 km hlaup, tvö 100 mílna (170 km) utanvegahlaup, hún hefur farið níu utanvegahlaup sem eru lengri en 100 km, sex sinnum hlaupið Laugaveg Ultra og er eina íslenska konan sem hefur klárað Mt. Esja Ultra Iceland (11 ferðir upp að Steini). Auk þess hefur hún klárað fimm Ironman keppnir og nokkur maraþon. Hún er Landvættur númer átta og “En Svensk Klassiker” númer 10834. Halldóra hefur gengið í grunnbúðir Everest og þekkir því af eigin raun að hlaupa í hæð.
Helga María er mjög reynd leiðsögukona og hefur leiðsagt ófáar ævintýraferðirnar, hún er formaður fjallaleiðsögumanna á Íslandi og mikill náttúruhlaupari. Hún er menntaður náttúruland- og jöklafræðingur og er mjög fróð um náttúru og jarðfræði og hefur gaman af því að deila með öðrum.
Helga María hefur ferðast víða og hún þekkir vel ferðamennsku í hæð og ferðalög á framandi slóðum. Hún mun leiða hópinn í göngunni upp í grunnbúðir Everest og tryggja sem besta hæðaraðlögun. En góð hæðaraðlögun er lykilatriði til að upplifunin í hlaupinu verði sem ánægjulegust.
Það má lofa því að það er aldrei leiðinlegt í kringum Halldóru og Helgu Maríu!
Gisting
Þær nætur sem hópurinn er í Katmandu mun hann gista á frábæru hóteli sem er miðsvæðis í borginni.
Á meðan á göngunni stendur dvelur hópurinn í nepölskum skálum sem eru einnig þekktir sem tehús. Tehús eru einfaldir óupphitaðir skálar með vinalegt andrúmsloft en lítinn lúxus enda eru þeir staðsettir langt frá næsta vegi og þarf því að bera allt til þeirra – af mönnum og dýrum. Herbergin eru tveggja manna með sameiginlegri þvotta- og salernisaðstöðu. Sumir skálar bjóða upp á heitar sturtur (greitt sérstaklega fyrir) og hleðslu fyrir rafhlöður (greitt sérstaklega fyrir). Það er alveg ógleymanlegt að dvelja á tehúsum og frábær leið fyrir okkur að hitta annað fólk sem mun taka þátt í hlaupinu.
Í Everest base camp gistum við tvær nætur í tjöldum þar sem þar eru ekki skálar. Við gistum í fjallatjöldum og auk þess verður borðtjald og klósetttjöld fyrir hópinn. Kokkur mun sjá um að elda fyrir okkur og hita vatn fyrir drykki og þvott.
Innifalið í verði
- Undirbúningsfundur með leiðsögumanni fyrir brottför.
- Skráning í Everest maraþonið, keppnisgögn og keppnisbolur.
- Hátíðarkvöldverður í Lukla að loknu hlaupi og í Kathmandu 2. júní.
- Íslensk leiðsögn.
- Ráðleggingar varðandi flug. Akstur til og frá flugvelli í Kathmandu.
- Hótel með morgunverði í Kathmandu í 4 nætur.
- Skoðunarferð um Kathmandu með staðarleiðsögumanni.
- Innanlandsflug til og frá Lukla.
- Nepalskur gönguleiðsögumaður og aðstoðarleiðsögumaður.
- Burður á farangri á meðan á göngu stendur, 1 burðarmaður á hverja 2 farþega.
- Tryggingar staðarleiðsögumanna og burðarmanna.
- Leyfisgjöld og aðgangur í Khumbu þjóðgarðinn.
- Allur matur og gisting í gistihúsum á göngunni.
- Lyfjakista með sérhæfðum lyfjum og súrefniskútur.
Ekki innifalið í verði
- Flug til og frá Kathmandu.
- Vegabréfsáritun til Nepal, keypt á flugvellinum og kostar 40 USD.
- Matur í Kathmandu, annar en morgunverður.
- Þjórfé til heimamanna.
- Persónuleg eyðsla eins og aðgangur að neti á göngunni, drykkir og hleðsla á raftækjum.
Dagskrá
Ísland – Kathmandu
Kathmandu
Kathmandu – Lukla – Phakding (2610m)
Phakding - Namche Basar
Namche Basar aðlögunarhlaup (3440m)
Namche Basar – Khumjung (3.740m)
Kumjung - Tengboche – Deboche (3820m)
Deboche – Dingboche (4410m)
Dingboche aðlögunarhlaup
Dingboche – Lobuche (4910m)
Lobuche – Gorakshep (5140m)
Ghorakshep – Kalapattar (5550m)
Ghorakshep - grunnbúðir Everest 5.365m
Grunnbúðir Everest
Hlaupadagurinn
Namche Basar – Monjo (2835m)
Monjo – Lukla (2480m)aðlögunarhlaup
Lukla – Kathmandu
Kathmandu
